لا شيء
يحدث بالصدفة
من انت حقاً .
لاشيء يحدث بالصدفة فان كل شيء يحدث بسبب و لسبب ما قد
لا تكون فى الوقت الحالي مدرك لهذة الحقيقة و لكن هذة هي الحقيقة فى تقبل ان كل ما ستقابله في هذة
الحياة فانه لسبب قام الله تعالي بوضعه في طريقك و في طريقك للنمو الروحي بشكل عام
يعني اللي عايز اقولهولك ان مفيش صدف ان الصدفه هنا مش موجودة كل حاجة ربنا عملها
لسبب او لاختبار لما تتأمل شوية هتحس بدا و لما تكبر هتعرف اللى بكلمك عليه يمكن
وانت صغير في السن شوية الموضوع دا هيكون صعب انك تشوفوا قدامك .
هتقابل
ناس في طريق حياتك هتحاول انها تهدك او تهدم افكارك زي ما في ناس هتقابلهم يسعدوك
انك تطلع لقدام اي حاجة محتاجة منك نوع من الوعي و الادراك يعني تعرف انت عايز
توصل لايه و في حقيقة ديماً حطها في دماغك طول ما انت ماشي لقدام ان الانسان
مقدموش غير السعي بس انما النتايج دي مش بتاعتك انت .
السعي و السعي و بس صدقني عشان متتعبش يعني في حاجات
هتعملها في حياتك و هتنجح و في حاجات تانية ممكن تفشل المهم متخدش المواضيع دي علي
اعصابك خالص لان زي ما في فشل في نجاح الشاطر اللي لما بيقع بيعرف يقوم بسرعه و
يكمل صحيح في بعض المواضيع بتاخد منك وقت انك تعرف تقف تاني و تكمل بس اللى عايز
اقولوا هنا و هنا بس ان انت اللى بتحدد و بتسعي انما التوكل علي ربنا عز وجل طبعاً
.
الدنيا زي ما بتاخد منك بتديك برضه وان كل حاجة بتعملها
قدامها حاجة يعني خليك عارف الحقيقة المطلقة دي بتشتغل بتضحي بالوقت و اللعب مثلا
بتعمل حاجة بتضحي بحاجات تانية مفيش حد بيعرف يعمل كذا حاجة فى نفس الوقت بنفس
الجودة و يمكن في كتابي ايقظ التنين بداخلك قلت لك ان الاعمال المتعددة او ال Multitasking دي وهم و
صراحه بعتبرها هجص ان انا اوهمك انك تقدر تعمل كذا شغلانه فى نفس الوقت و نفس
القوة مع بعض طبعا احنا مش اللات عشان نعمل كدا بس في مدارس ادارية بتنصح بموضوع
المالتي تاسكينج كنت زمان اى حاجه اقرئها اصدقها وخلاص كانها مسلم بيها لكن بعد
كدا عرفت ان ممكن دي افكار واحد قد لا تتماشي معايا شخصياً او تكون ضد مبدئي عشان
كدا قررت مصدقش الا اللى انا متوافق معاه او حسه صح و بس تقدر تقول كدا شيلت
الغمامه علي عيني .
فى
العالم اعتقد فى نوعين من الناس عمال للنور و عمال للظلام و عمال النور دول اللى
بينشروا النور و الخير بين البشر في نوع تاني هدام بسميهم عمال الظلام الناس دي
بتنشر الظلام الشر بانواعه المخدرات و غيره بين البشر و الفريقين دول شغالين انهم
ينشروا الحب او الشر كل علي حسب طريقة .
ناس
كثيره بتقول ان الطريق هو اللى بيختارنا مش احنا فعشان كدا ديماً ادعي ربنا انه
يلهمك الطريق الصح و انك تكون من عمال النور والحب و الخير بين الناس و انك تكون حمامة
سلام .
خليك عارف ان من النهاردة مفيش حاجه اسمها صدفة اسعي و
اعمل اللى عليك و خليك عامل من عمال السلام و النور و السعادة بين البشر كون بشارة
للحب متكونش علامة من علامات الشر و الخوف بين الناس خليك واثق ان الخير ديماً
بيكسب في نهاية الرحلة و ان الحب باقي و ديماً كنا بنسمع ان السيرة الطيبة بتبقي
لاخر العمر .
خلي سيرتك حلوة ديماً و حبب الناس فيك و الناس المؤذية
ابعد عنهم و ابعد عن اصدقاء السوء فان الصاحب ساحب يسحبك لو بيشرب مخدرات او مؤذي
هتبقي زيه فنصيحة ابعد عنهم و ادعيلهم بالهداية .
