مش متضطر تثبت نفسك لحد
ايوا انت مش مضطر انك تثبت نفسك لحد انك تستحق !.
مش مصدقني دي حقيقة اصل انت لو كل شوية عايز تثبت للناس حاجة هتعيش طول عمرك في دوامة اني لازم اثبت اني صح و الناس غلط .
و صدقني الحته دي ملهاش نهاية .
عمرك شفت الهامستر و هو بيلف الحلزونة ؟
ايوا بيفضل يلف في دايرة مفرغه بين قوسين كدا اه هو بيلعب بس مش بيوصل لحاجه خالص .
طب خلينا نقعد مع بعض كدا انت كل شوية عايز تثبت نفسك لناس طب الهدف ايه بجد؟
عايز تبان انك صح و هما غلط او انك فاهم و هما لا .
طب بامانة انت بقالك فتره بتعمل كدا عمرك حسيت انك فرحان لانهم صدقوك طب حتي لو حسيت لوهله بكدا بعدها حسيت بايه ؟
كم الوقت اللي ضاع منك عشان بس تثبت نفسك لحد او وجهه نظرك لحد كمية المجادلات اللى عملتها ياتري استهلكت منك و من طاقتك اد ايه ؟
جه الوقت انك تتحرر من الناس اللي معلقه فى دماغك انك متضطر تثبت لهم انك صح طول الوقت اللى عايز يصدقك هيصدقك والله ولو قلت ايه ؟.
و اللى مش هيصدقك برضه مش هيصدقك والله لو قلت له ايه ؟وحاولت تجيب له مليون اثبات انك صح .
القصه باختصار انت مش مضطر تثبت حاجه لحد .
خليك واثق فى نفسك و فى مشاعرك و اوعي تكبتها لانها اكيد تستحق انها تتحس .
هتريح دماغك اوي لو اشتغلت علي نفسك بس من غير ما تكون متضطر انك ديماً تثبت لهم انك صح و هما غلط او حتي تفضل تجادل لاثبات وجهه نظرك .
خليك انت و انت و بس و اللي عايز يصدقك علي كدا فل و عاش اما اللي مش عايز دي وجهه نظرة هو بمعني اصح مش هتفرق معاك في اى حاجه خالص .
و مش كل لما حد يقولك حاجه عليك تصدقها لان صدقني كلام الناس مش كله صح اعمل اللى يرضي ربنا في الاول و فى الاخر و اللي انت من جواك مقتنع بيه خليني اقولك ان لكل واحد مننا رحلته الخاصة مفيش حد رحلته زي التاني بالضبط .
عمر ما في رحلة لاتنين زي بعض حتي لو كانوا مولودين مع بعض .
حاول تمشي ورا العلامات اللي فى الطريق منوره اللى بيمشي وراها اكيد هيوصل يعني العلامات المنوره اللي تودي للنور مش العلامات اللي تودي للطرق الظلاميه زي المخدرات و غيره لا انا هنا بقولك صحبة صالحة و ناس كويسه و حد يعلمك شيء كويس .
من النهارده متثبتش نفسك لحد لانك مش مضطر .
و دمتم سالمين
