لا
تنسي دور المعلم
يمكن اكتر اختبار صعب ممكن تتعرض ليه في حياتك انك تنسي
دور المعلم اللى علمك بمعني ان لما يجي حد يعلمك و يكون هو مستقبلك في الشغل فمش
معني انك قعدت في المكان سنه و لا سنتين انك عرفت كل حاجو و انك وصلت لدرجة انك
تقارن نفسك باللى علمك او تقول عليه مش بيعرف اى حاجة.
اللى
بحكيلك عليه دلوقتي دا مواقف شخصية شفتها بعيني لمجموعة من الافراد ابسط ما يقال
عنهم انهم ناكرين للجميل اول لما قعدوا سنتين فى الشغل اول حاجة قالوها على اللى علمهم
مباديء الشغل انه مش بيفهم حاجة فى الشغل .
يعني لمكن في مقوله قريتها للكاتب الشهير واين داير ان
المعلم سيظهر عندما يكون التلميذ جاهز و انا مؤمن تماماً ان المقولة دي صح جداً
جداً لازم تكون جاهز عشان ربنا يبعتلك اللى يعلمك بس اهم حاجة نيتك تكون خالصه و
صادقة .
في قصة جميلة في سورة الكهف عن سيدنا موسي عليه السلام
لما ربنا اراد انه يقابل سيدنا الخضر رضي الله عنه عشان يتعلم منه و لم يستكبر
سيدنا موسي علي العلم علي الرغم انه نبي كمان سيدنا موسي لم يستكبر علي طلب
المساعدة من ربنا عز وجل و انه يخلي سيدنا هارون يبقي سند و عون ليه هنا فى القصص
دي ربنا عايز يقولك مفيش حد كبير علي العلم و ان فوق كل علم عليم وانك مطالب بالتعلم ديماً .
لا يوجد حدود للعلم انت مطالب بالسعي و ان ليس للانسان
الا ما سعي و لكن النتيجة بتاعه ربنا عز وجل مش بتاعتك انت فديماً احمد ربنا علي
كل حاجة ادهالك يعني احمد ربنا على كل اللى معاك مهما بدي انه قليل بالنسبالك لان
بالنسبة لناس تانية ليه قيمة كبيرة .
عمر
ماكانت السعادة في مراكمة الاموال و تعديدها لان في نهاية رحلتك مش هتاخد معاك
الفلوس و لا العقارات و لا المدخرات و لا اى شيء هتاخد عملك الصالح فقط مش اكتر و
من هنا اعمل على نشر بذور الخير والحب و العطاء بين الناس .
خليك واحد من عمال النور و خلي هدفك ديماً انك تساعد
الناس لان في مساعدتك ليهم خير كتير ليك . في ناس كتيرة فاكره ان لما بيدي حد او
يساعد حد دا بياخد منه و ان خسران الوقت و الجهد و الفلوس دي خليني اقولك انك
كسبان ان الكسبان ديماً هو اللى بيساعد الناس و بيدي اكتر ما بياخد و كتير من
حوالينا علامات في طريق بعض .
حاول ديماً تساعد بدون النظر عن المقابل يعني لا تنتظر
المقابل للعمل لان لو حسبتها كدا هتلاقي ان في اعمال كتير ممكن يكون مقابلها بس حب
الناس و مساعدتهم مش شرط كل حاجة يكون قدامها في المقابل حاجة ابعد شويه عن مفهوم
المصالح المتبادلة و ان طالما اديت حاجة لازم يكون قدامها حاجه لان دا صدقني
هيتعبك في حياتك و فى ناس بتقولك لا انا ضيعت عمري على ناس تانيه طب ليه متقولش ان
ربنا جعلني سبب فى حياه ناس تانية .
ناس كتيرة بتتبني فكره اني خلقت اني اساعد الناس و انا
شايف ان دا حاجه جميلة فى حياتنا اننا نساعد بعضنا البعض لان دا هدف الحياة ان كل
واحد فينا يساعد التاني و انه يكون سبب فى نشر طاقة الحب اللى هي اعظم طاقة فى
الكون كله حولينا و اننا نكون سبب في الطاقة الجميلة دي اللى بتساعد فى حياه ناس
كتيرة حولينا و اننا نكون سبب فى جعل حيوات ناس تانية تكون الافضل ديماً .
اكيد كلنا عايز يسيب علامة قبل ما رحلته تخلص في الكوكب
دا عشان كدا اعمل و اسعي و ربنا هيكون معاك ديماً و مطلع عليك كل ما عليك الايمان
و اليقين و ان يكون الحب هو اساس لحياتك .
عشان كدا في الفصل دا اكدت على دور المعلم لان المعلم
ليه دور انه يعرفك الطريق اللى انت المفترض تمشي فيه عشان يكون وسيلة لمساعدتك انك
توصل للطريق و مش مهم السرعه على اد المهم انك تحب الطريق و ان ديماً الطريق هو
اللى هيختارك مش انت اللى هتختاره .
اخلص نيتك و اسمع كلام المعلم و تذكر فضله عليك.
