كن انت
لو بصيت حوليك هتلاقي ان اي كائن حي مش بيعرف الا انه
يكون نفسه و نفسه و بس يعني الاسد مش بيعرف الا انه يكون اسد و بس و الغزالة مش
بتعرف الا تبقي غزالة وبس و هكذا يعني محدش منهم بيعرف يمثل او يبقي حاجة هو مش
عليها او مش نفسه .
الى عايز اقوله هنا انك الدنيا بتاخدك انك اوقات كتيره
تقلد ناس تانية او انك نحط نفسك في مقارنات اكيد هي مش في صفك و نوع كدا من السباق
الوهمي يعني افتكر لما كنا صغيرين اهلك يحبوا يحفزوك فتلاقيهم يقولولك خليك زي
فلان او فلانه الشاطرة.
شوف فلان شاطر ازاى و تبدا حلقة المقارنات فتلاقيك لما
تكبر تخش في دايرة كدا من السباق الوهمي انك بتنافس ناس بس حقيقة الامر انت مش
عارف بتنافس مين او عشان توصل لايه .
معقوله يكون هدف الحياة السباق الوهمي دا اعتقد لا و ان
كانت دي طبعاً وجهه نظري الي تحتمل الصح او الخطأ فأن السباق الوهمي دا بيعطلك
كتير يعني معلش يعني مش شرط انك تكون الاول او من ضمن الاوائل عشان تحب نفسك او
انك تعرف انك مميز و ممتاز مش شرط خالص .
العيلة و المجتمع للاسف ليهم دور هنا في تصنيفك كويس او
وحش بناءاً علي انجازاتك او ما تملكه من اموال و غيره من المحددات الى بيفرضها
الناس و المجتمع عليك .
خليني اقولك ان القناعات الداخلية بتاعتك ومحتاجه نظر
بالاخص السباق الوهمي الي بقالك كتير ماشي فيه السباق المفرغ الى ملوش نهاية دا
فان كان في حاجة زي ما بكرر و بقول تستحق انك تنافس عليها فهي العمل الصالح .
خد بقي المثال الحلو دا كن مثل الماء لان الماء بيمشي في
اى قالب و بياخد شكل اى قالب و بياخد اي طبيعة مهما كانت حالته باختصار كدا بياخد
شكل الحاجة الى بيمشي فيها و عمره ما فكر هو اد ايه مهم و ضروري لحياة الكائنات
الحيه هو بيعمل دا بحب و شغف .
الماء مثال حي جدا جدا لطبيعة الحياة التناغم الى
المفروض اننا نكون كلنا عليه فخليك انت و متخليش حد يجبرك انك تاخد صور مش صورك او
انك تدوس علي نفسك اوى عشان توصل لحلمه هو مش حلمك انت او تبقي شبهه .
انت انت بس مش حد تاني يعني متخدش شكل مش شكلك لان صدقني
هتتعب نفسك انت فريد في اللى انت عليه و بس يعني ربنا خلق كل واحد فينا و ليه ميزة
فريدة عن غيره اللي المفترض انك تستغلها و تبقي مميز فيها و تفيد بيها الناس
التانية فالاختلاف دا سنة ربنا عز وجل و تخيل معايا كدا لو كلنا كنا شبه بعض ؟.
اكيد كانت هتبقي حالة ممله جدا جدا كلنا شبه بعض و ليه
هنحتاج بعضنا بعض طالما كلنا زي بعض فعشان كدا ربنا عز وجل خلقنا مختلفين عشان
الدنيا تمشي دا حتي حالتنا النفسية بتتغير من حال لاخر .
في كل
فتره من فترات حياتك هتمر عليك مواقف هتغير من وعيك و اكيد الوعي دا هياخدك و
يوديك علي مجموعه من الحاجات اللى هتبقي محتاج انك تبص عليها بقرب من جواك يعني
اقدر اقولك انها رحلة لجواك ( رحلة داخلية ) .
عارف ان دي اصعب رحلة هي رحلة مع ذاتك اللي تقدر تشوف
فيها نفسك عايزه ايه بالضبط و بتحب ايه عايز اقولك ان في ناس لحد دلوقتي مش عارفه
هي عايزه ايه او بتحب ايه ! الكلام دا حقيقي .
تفتكر امتي اخر مره قعدت فيها مع نفسك ؟
طب قالت لك ايه ؟
و هل بتسمعها ؟ و لو سمعتها قبلت لها و لا حكمت عليها ؟
كن صريح مع نفسك بصراحة في كل خطوة بتاخدها لان مع كل
صراحة مع نفسك بتكون بتكسر قيود الماضي اللي بتعرقلك و بتوقفك .
من هنا ومن هذا الوقت كن انت و انت فقط كن كالماء الذي
يعرف كيف ينتقل من حاله الى حاله و يتناسب مع كل الحالات بدون جهد او مشقه .
رسالتي اليوم هو انت فقط
