عيش وكان حياتك تصنع الفارق
ربنا مخلقكش كدا اكيد ليه حكمة فى دا عشان كدا عايزك من النهاردة تعرف ان حياتك دي ليها لازمة مهما كانت افكارك او قلقك او همومك او احزانك عايزك تعرف كويس اوى ان ربنا عز وجل و ضعك عشان تعمل فرق في الحياة .
يعني باختصار انت مش زي اخوك او والدك او والدتك .
لا انت غيرهم الدليل علي كدا لو جبت حتي اتنين تؤام عمرهم ما هيكون بصمتهم زي بعض طب الحكمة اعرفها ازاى ؟.
مش مطلوب منك انك تعرف حكمة ربنا عز و جل فين المطلوب منك فقط انك تكون مؤمن ان ليك هدف و انك فارق فعلاً في حياة الناس التانية و انك تسعي جاهداً انك تطور من نفسك و تساعد الناس .
صدقني ان اغلب الناس الناجحه عمرها ما بصت علي فلوس او كان هدفها انها تعمل فلوس بس .
في ناس عدت فكرة المال و تجميع و مراكمة الفلوس لان فعلياً الفلوس وسيلة مش غايه يعني هي ضرورية بالفعل و ربنا فعلياً قال ان المال و البنون زينة الحياة الدنيا في سورة الكهف لكن الباقيات الصالحات افضل منها كمل بقية الايات و انت تعرف ان الباقي العطاء .
هتقولي طب انا معيش اعمل ايه ؟
ادي حتى وانت معكش و مش شرط فلوس ممكن تدي صحتك و تساعد ناس ناقصة صحة او ترسم بسمة علي وش طفل ممعوش حاجه تديله لبانه او فلوس او حاجه بسيطة او حتى البسمة اللى لا تقدر بتمن .
ناس كتير فاكره انها كمالة عدد او ربنا خلقها كدا .
اجابتي ليك اكيد لا طبعاً انت لو ملكش لازمة يبقي ربنا خلقك ليه؟.
ربنا عز وجل لا يخلق من العبث .
لا ليك طبعاً لازمة و ليك دور في اعمار الارض .
عايزك من النهاردة تعرف ان ليك دور و دور فعال كمان و تدور انت شاطر في ايه و تطوره عشان تفيد بيه غيرك المحتاجين لده .
رسالتي ليك النهاردة اعرف قدراتك و انت شاطر في ايه بالضبط و علي اد ما هتدي الناس ربنا هيديك من عنده كتير و اكتر من دعاء سيدنا رسول الله اللهم اني اسالك العفو و العافية و العفاف و التقي و الغني صدق رسول الله صلي الله عليه و سلم .
لما تفشل كمل و اوعي تقف لان اديسون فشل تقريباً زي ما بيقولوا 9999 مره عشان مره واحده بس تنجح انت متخيل الرقم ولما سألوه قال انا عملت تجارب مكنتش ناجحه بس كانت محاولات انها توصل للنجاح .
لما بتخسر انت بتخسر معركة لكن عمرك ما هتخسر الحرب.
لان الحرب مش بتنتهي الا بموت المقاتل يعني هتفضل شغاله طول ما فيك نفس و بتعافر في الدنيا كلنا عارفين ان الدنيا دي دار ابتلاء و عمل و اللى بيعمل مسيره هيوصل لكن اوعي تنام علي المخده و تكون مستني حد يوصلك .
لا دا مش حالنا مش عايزين نركن للصدف او لمصباح علاء الدين اللى علاء الدين نام عليه و مشتغلش حاجه عشان في الاخر يتجوز الاميرة بدون تعب احنا مش كدا و عمرنا ما كنا كدا احنا شعب و جيل كافح و وطن عربي مر بظروف صعبة لكننا مقاتلين لاقصى الدرجات و بنحب الشغل و احنا اللى علمنا العالم كله و نورناه .
في لسه قدامنا كتير و بطارياتنا عمرها ما هتفضي لان ربنا بيشحنها ديماً.
خلي ايمانك قوي و قلبك عامر بذكر الله تعالي و هتدعيلي هتلاقي الفرج و اليسر .
ربنا بيقولك لو باب اتقفل في غيره وراه مفتوحين بس حاول بس انت و افتح و انا معاك و هساعدك فعشان كدا عايز اقولك ان رضا ربنا الاساس فلو ربنا معاك مفيش مشكلة لو خسرت كل حاجه في سبيله لانه هيساعدك انك تنجح .
النجاح حلو بس اللى نجحوا قدامك دول فشلوا كتير اوى اوى عشان يوصلوا للنجاح دا هنا انا بقولك اسمح لنفسك انك تفشل و الفشل دا هيعملك مش شرط انك جبت مجموع وحش او محققتش حلم بابا و ماما انك كخه و وحش لا ابداً ممكن دي تكون بداية حلم جديد .
وخليني اقولك حكايتى انا بابا كان نفسه اطلع مهندس و كان ديماً يقولي نفسي اشوفك شايل مسطرة حرف T و انا الحلم دا عمري مصدقته لاني عمري ما حبيت الهندسة مش معني كان ان الهندسة وحشه.
لا ابداً كان طول عمري احب اكتب و اقرأ ميولي كانت كدا عشان كدا عمري ما حبيت الحلم دا و ليك انك تعرف النتيجة جبت مجموع ميدخلنيش هندسة وقتها و دخلت تجارة عربي و لما دخلتها اجتهدت و طلع دا حلمي و مكاني الصح رغم اني فى الاول كنت مضايق اني مدخلتش هندسة زي ما بابا حابب و طلعت فى تجارة من اوائل الدفعه و اشتغلت فى مكان محترم بعد كفاح و الحمد لله .
ولما كبرت في السن و زاد و عيي عرفت انى بحقق حلم بابا مش حلمي ! تخيل بقي في كام واحد مننا بيعمل احلام غيره من غير ما يدري بيها او عمل كدا عشان بابا و ماما و ستو و خالوا وي وي …
قلب جواك هتلاقي كتير كدا .
بطل تحلم احلام ناس تانيه احلم احلامك انت لان لو مش هتعرف تحلم تبقي مشكلة مهما كانت ظروفك احلم و صدق حلمك لان الاحلام مش بفلوس و بلا قواعد و قيود.
ربنا سبحانه و تعالي ادهالنا حق اننا نحلم و نحب و نتحب كن انت طاقة للحب في كل مكان و ابعث الطاقة دي .
انا قررت الكتابه و انا سني 35 سنة شوف بقي 35 سنة و انا حابس الافكار و الشغف دا كله جوايا ليك انك تتخيل مهارة مكبوته وكنت ديما اقول لنفسي طب لو كتبت حد هيقرأ ؟
بعدها قررت اني مليش دعوة هكتب و السلام انا ليا رسالة بوصلها مش محتاج حد يقرأ عشان حلمي يبقي اتحقق .
انا لو قرأ لي واحد بس و هو مؤمن و اثرت فيه بجد دا بالنسبالي نجاح فعلاً لاني قدرت اءثر في واحد تاني و نقلت له وعي يفيده .
رسالتي ليك انت !.
انت مش حد تاني صدقني كون انت و بس.
مش احلام ناس تانية و انت بوضعك دا والله مهم مش نكره اعمل اللى يرضي ربنا و اللى تحبه و باذن الله هتنجح .
و عيش ديماً وانت عارف ان حياتك ليها قيمة و فارقه فى حياة الناس التانية .
اعمل اللى عليك و النتيجة مش بتاعتك
