‘ڤاليو’، شركة التمويل الاستهلاكي التابعة لـ ‘إي إف جي القابضة’  أعلنت إنها هتغير العلامة التجارية بتاعتها عشان تقدم خدمات أكتر في مجال التكنولوجيا المالية.

• أصل الموضوع: ‘ڤاليو’، المعروفة بخدماتها للشراء الآن والدفع لاحقًا (BNPL)، غيرت علامتها التجارية لتقديم خدمات أكثر، من ضمنها خدمات الادخار والاستثمار، ووسائل الدفع الرقمية، وحلول أخرى للشركات.
  • دي مش كل حاجة: عشان كل ده يتحقق الرئيس التنفيذي لـ ‘ڤاليو’ قال ‘للشرق’ إن الشركة هتقدم طلب للحصول على ترخيص التكنولوجيا المالية من الهيئة العامة للرقابة المالية.
  • لما تعمقنا أكتر، اكتشفنا إن ‘ڤاليو’ عندها ترخيص من ‘الهيئة العامة للرقابة المالية’ للتمويل الاستهلاكي من سنة 2020. وبالتالي، الحصول على ترخيص التكنولوجيا المالية معناه الحصول على التصاريح اللازمة علشان تقدم الخدمات الجديدة دي.
  • الشركة عاملة ايه؟: إيرادات ‘ڤاليو’ تقريباً زادت تلات مرات على أساس سنوي في الربع التاني من 2023، ووصلت ل 207 مليون جنيه.
• ليه ده مهم: ‘أمازون’ استحوذت على حصة بنسبة 4٪ في ‘ڤاليو’ السنة اللي فاتت والاستحواذ ده قدر قيمة ‘ڤاليو’ بـ 235 مليون دولار وده تقريباً بيمثل 32٪ من القيمة السوقية لـ ‘إي إف جي’.
• ودلوقتي: ‘ڤاليو’ بتخطط لإصدار سندات توريق بقيمة مليار جنيه في سبتمبر 2023 لتمويل قروضها، حسب ‘المال’.
• معلومة كلابس: سندات التوريق شبه حزم مالية بتجمع أنواع مختلفة من القروض علشان تتباع لمستثمرين. والمستثمرين بيستفيدوا من الفوايد اللي بتتدفع على القروض دي، أما الجهة المصدرة بتستفيد من تحويل قروض غير قابلة للتداول لكاش.

مصر تهدف لتزويد استيرادها من الغاز الطبيعي اللي جاي من إسرائيل بنسبة 31%.

• أصل الموضوع: من أول أكتوبر مصر ناوية تستفيد من زيادة إنتاج الغاز المتوقعة فى إسرائيل، المصحوبة بتخفيف في الاستهلاك عندهم.
  • فى 2022، مصر والاتحاد الأوروبي وإسرائيل وافقوا على أن أوروبا هتستورد غاز من إسرائيل بعد تحويله لغاز سائل في مصر، بغرض تقليل اعتماد الاتحاد الأوروبي على الغاز من روسيا.
• ليه ده مهم: الغاز المستورد هيساعد يسد عجز الغاز المحلي ويمكِّن مصر من الرجوع للتصدير بعد توقف النشاط خلال أزمة الكهرباء.
• ودلوقتي: إسرائيل بتستخدم الغاز اللي عندها محلياً وبتصدر الفائض لمصر والأردن. وبما إن مصر عندها محطات تسييل الغاز، بتقدر تصدره لدول الاتحاد الأوروبي.

‘بالم هيلز’ أصدرت نتائج أعمالها واللى بتعكس نمو فى للنصف الأول من 2023.

• أصل الموضوع: مبيعات المطور العقارى ‘بالم هيلز’ زادت بنسبة 84% على أساس سنوي لـ19.6 مليار جنيه. المبيعات كانت متركزة فى مشروعات باديا، وبالم هيلز الاسكندرية، وبالم هيلز القاهرة الجديدة، وذا كراون، وهاسيندا ويست.
  • صافى الدين زاد على أساس سنوى من 1.7 مليار جنيه  لـ3.1 مليار جنيه. المطور بينسب الزيادة دي لزيادة الإنفاق على أنشطة البناء، وعمل صفقات مبكرة بالجملة لحماية البنود المعرضة لتقلبات صرف العملة وللتحوط من زيادة الأسعار، بالاضافة لتعجيل مصروفات المقاولين وزيادة نسبة الدفعات المقدمة، ودة لتسريع الأعمال وبناء البنية التحتية.
  • الشركة برضه أصدرت سندات توريق بقيمة 472.5 مليون جنيه كجزء من مبادرتها لتنويع طرق التمويل.
• ليه ده مهم: أداء ‘بالم هيلز’ انعكس في زيادة صافي الأرباح بنسبة 9%، اللى وصلت لـ 608 مليون جنيه
• ودلوقتي: الشركة قالت انها متوقعه أداء المبيعات يكمل بوتيرته في الربع التالت، وأسست دة على أداء اطلاقاتها فى الساحل الشمالى ووتيرة مبيعاتها في مشاريعها الأخرى.

• ‘هشام رياض’ هو المدير التنفيذي  ورئيس مجلس إدارة ‘إثيدكو’ الجديد

  • ليه ده مهم؟ ‘إثيدكو’ في مراحلها النهائية للانضمام لشركة ‘سيدي كرير للبتروكيماويات’ المُسجلة في البورصة المصرية

     

• البورصة المصرية وافقت على الشطب الاختياري لشركة ‘العز الدخيلة’

  • ليه الشطب؟ لما تشتري ‘العز الدخيلة’ حصة الحكومة في الشركة، هيبقى في عدد أقل من الأسهم المتاحة للمستثمرين وده هيخلي أكثر من 90% من الشركة ملكية خاصة، وده بيتعارض مع متطلبات البورصة المصرية

     

• إيه اللي مشوق العالم؟ قمة ‘بريكس’ بدأت من كام يوم في ‘جوهانسبرج’، ورئيس الوزراء ‘مدبولي’ وصل المدينة امبارح.

  • مصر كانت قدمت طلب قبل كده للانضمام للتحالف الاقتصادي

  • هنستفيد إيه؟ هدف ‘بريكس’ تعزيز التجارة بين الأعضاء باستخدام
    العملات المحلية بدل الدولار، وده هيخفف من ضغط توفير الدولار

• ‘الجهاز المركزي للتعبئة العامة والإحصاء’: معدل البطالة في مصر قل بنسبة 0.1% في الربع التاني من 2023، ووصل لـ 7%.

  • معدل البطالة بين الإناث قل بنسبة 1.9%، ووصل لـ17.3%، أما معدل البطالة بين الذكور زاد بنسبة 0.3%، ووصل لـ4.8%