اكيد الكلام حلو بس كتره صدقني وحش
اغلبنا بيحب يتكلم بالاخص لو عايز يوري للناس اد ايه هو جامد و عمل حاجات حلوة في حياته او للتباهي و عند بعض الناس الفشخرة الكدابة .
بس صدقني لما وعيك بيزيد بتعرف ان اللي بيتكلم كتير دا حاجة مش حلوة بتقلل منه بالاخص لو بيتكلم في كلام تافه تفاهات الامور يعني لامؤخذة و كمان ده كدا بيخلي في اوقات كثيرة ناس تنقده و تستنقصه .
اغلب الناس اللى بتكون صامته تلاقي الناس بتحترمها و بقول اغلب لان الصمت دا بيخلي اللى قدامك مش عارف انت ايه بالضبط مش معني كدا اني بقولك متعبرش عن نفسك لكن متكنش كتير الكلام علي الفاضي و المليان لان صدقني كتر الكلام هيوقعك فى مشاكل لا حصر لها جداً جداً و هتكون عرضه في احيان كتيره للغيبه و النميمة .
بلاقيني دلوقتي قدام كلمة قوية سمعتها قبل كدا الذي يعرف لا يتكلم الصراحة كان كلمه قالها واين داير المحفز الشهير او زي ما بيقول البعض عليه ابو التحفيز و لو فكرت في الكلمة بعمق شويه هتلاقي فعلاً ان اللى عارف في معظم الاوقات هو فعلاً مش محتاج يتكلم .
فنصيحتي ليك النهاردة لو مفيش موضوع تتكلم فيه اصمت و بعد كدا هتاخد علي كدا و النصيحة التانية اذكر الله كثيراً و صراحة عايز اعتبرها دي النصيحة الاولى لان هتغنيك عن حاجات كتيرة ملهاش لازمه .
سهل جداً تبقي مش محترم بس العكس صعب
لو جبت برتقاله و عصرتها اكيد هتنزل عصير برتقال بالضبط كدا فانت عند عصر اي حد بيخرج كل اللى جواه بالبلدي كدا .
فتخيل بقي انت جواك ايه فلما الدنيا او الناس هتضغط عليك هتطلع كل اللى جواك عشان كدا عايزك يكون اللي جواك دا حلو او حاول انه يكون حلو لان فعلياً سهل جداً تبقي مش محترم و الناس تكرهك انما النقيض صعب و اغلبنا عارف القصة دي .
فمثلاً سهل انك تتعصب و تكره الناس فيك ولو انت طبعك عصبي حاول تشتغل علي نفسك انك تحد من دا لان العصبية اساساً مش حاجة حلوة دي بتودي في داهية و بتعمل بلاوي و بتجيب مشاكل صحية و هنا حدث و لا حرج .
لو حد اتعصب عليك حاول تقول جواك ياتري هو اتعصب ليه ؟ و حط نفسك مكانه دا الموضوع ببساطة ياتري هو ايه وصله لكدا ؟ و حاول تفهم دا و انت لو حد عمل كدا حاول تبعد و اوعي تاخد قرار في اى حاجه و انت غضبان اوي او فرحان اوي فى الغالب هيكون القرار دا غلط حاول تاخد قراراتك و انت متزن في حالتك العادية يعني .
و صدقني الدنيا مش مستاهلة الصراعات و القيل و القال الدنيا اسهل من كدا اوي خالص بسيطة احنا بس اللى بنصعبها علي بعض و نقاتل في سباق وهمي عايزين كل واحد يبقى حلو و قمور و اشطر من اخوه طب فى الاخر يا تري في جايزه هناخدها ؟
السباق الفعلي لو عايز تسابق سابق فى الخير و عمل الخيرات و انك توصل لربنا لا هنا اقولك موت نفسك لان الجايزة كلنا عارفينها كبيره الا وهي رضا ربنا عز وجل و الجنه غير كدا كله سباق وهمي فاوعي تضغط علي اعصابك عشان شويه فلوس او تدوس علي حد عشان كام قرش زيادة و خلي بالك ان كلما انفقت على الفقراء و المساكين ربك يزيدك باذنه .
و مش كل حاجه ربنا تعالي حرمك منها حلوة او تستاهل ممكن يكون حرمك منها لانه اكيد عارف انها لو معاك ممكن تعملك مشاكل فكن ممتن بجد لكل اللى عندك و احمد ربنا و من حمده زاده .
