رحلة البحث عن الاموال
كلنا بنحب اكيد يكون عندنا حاجات كتيرة و الحاجات الكتيرة دي بتبقي عايزة برضه فلوس كتيرة عشان نشتريها بيها بس للاسف لما بنجمع الحاجات الكتيرة دي بعد فتره الحاجات دي بتملكنا و بنتعلق بيها مش كدا و بس دا كمان لما بنفقدها بنحس اننا بنفقد جزء كبير من هويتنا .
الحاجات ممكن توصل في فتره من الفترات انها تبقي تعلق و معني كلمة تعلق هنا انك تتعلق بيها و تاخد وقتك و مجهودك كله و يبقى كل تفكيرك فيها و في سورة الكهف قال ربنا عز وجل ان المال و البنون زينه الحياة الدنيا بس فى كماله الايه قال ان الباقيات الصالحات خير عن ربك ثواباً و خيراً املاً فالمال اكيد اساسي للحياة و هو حاجه مش وحشه يعني لما يكون عندك مال اكيد هتعمل بيه حاجات حلوة وكمان تقدر تساعد بيه ناس اكتر و اكتر و تعمل حاجات خير كتير .
بس انا هنا بتكلم عن الناس اللى بتنهم انها تنال من المال الكتير و الكتير يعني مهما اخد منه يبقى عايز منه كتير الناس دي بيبقى كل فكرها مشغول بالدنيا و اد ايه انا ممكن اكسب فلوس و بعد كدا للاسف ممكن الموضوع يتطور الى انه يدور على الفلوس مهما كان مصدرها .
طب خلينا نتخيل قصه كدا ان واحد طول حياته عايز يجمع فى فلوس بس هل حياته هتبقي ممتعه ؟ اعتقد لا ان كل التفكير هيكون منصب اني اجمع اكبر قدر دون الاستمتاع بالمبالغ الي جمعتها عشان كدا يمكن اغلب الناس اللى بتقدم دروس او حاجات تعليمية او ارشادية او مساعدات للغير مش بيبقي هدفهم المال .
الهدف هنا حاجة اسمي و انه يعلم حد جديد وانه يكون نواه لتعليم ناس جداد و بعد كدا المال بيجي لوحده سبحان الله رغم عدم سعي الشخص دا ليه باي شكل .
انا هنا مش بقولك انك متطورش نفسك وانك تسعي لا اسعي و بقولك كمان انك تعمل دخل سلبي يصرف عليك ايه يا عم احمد الكلام الجامد دا يعني ايه دخل سلبي ؟
الدخل السلبي انك تعمل حاجه لمره واحده بس الحاجه دي تصرف عليك بمعنى انك تحط فلوسك في حته مثلا زي بنك و تاخد عليها عائد و انت نايم او مثلاً تألف كتاب أو تشتغل على اليوتيوب او علي مدونة كل دا شكل مبسط من الدخول السلبية يعني باختصار انك بتحط حاجة او بتعمل حاجة والحاجة دي تصرف عليك وانت باشا نايم مش بتعمل حاجة .
طب الدخل السلبي دا علي كدا مفيد اوي اه طبعاً و انا هنا بانصحك انك تزود مصادر دخلك بالطريقة دي بس خلي بالك انه عشان يزيد الدخل لازم الاول تكون بتدخر جزء من المبلغ اللى بتحصل عليه بمعني ان مش كل اللي بتاخده بتصرفه لانك لو بتعمل كدا يبقى صباح البرتقال !.
مش هتوصل لحاجة حاول انك تكسر قرش زي ما بيقولوا و تحوشوا و ان يكون مبلغ للظروف الطارئة يعادل تقريباً سته اشهر من احتياجك الشهري دا بره استثماراتك و طبعاً لما تستثمر استثمر في حاجات بتلائمك يعني فى ناس بتحب المخاطره العاليه و ناس لا نقي اللى تلاقيه ماشي معاك انت و سهل انك تفهمه .
عايز اقولك ان الفلوس السايله بتتعرض لحاجة اسمها التضخم يعني ببساطه كدا قوتها الشرائية بتقل مع الوقت يعني الجنية اللى معاك النهاردة مش هو هو الجنية بعد ثلاث سنوات فهمتني عشان كدا اللى بتزيد قيتمه مع التضخم او بالبلدي ارتفاع الاسعار العقارات بتزيد جدا جدا و الدليل شوف حوليك اسعار الشقق بقت عامله ازاي دلوقتي .
فانت اقعد مع نفسك و اعمل خطة استثمارية لنفسك من خلالها ضبط استثماراتك بحيث انها تناسبك و متخشش فى اكثر من مجال مره واحده ابدأ في مجال واحد اتقنته خش على اللى وراه و هكذا مش كل مع بعضه عشان لو دخلت كله مع بعضه مش هتستفاد حاجة بل ممكن تخسر كمان .
و مش عيب لو مش عارف تسال خبير او تشترك مع حد فاهم شركة محترمه بتدير الاموال مثلاً او بنك او صندوق استثمار الى عايز اقوله الفلوس مش حرام و لا وحشه لكن النهم الزايد عليها يعلقك بيها و بالدنيا استخدمها بحكمه و الحكمه دي هتوصل لها لما تسمع لصوتك الداخلي اللى بيرشدك تعمل ايه و امتي و ازاى .
غير قناعاتك بخصوص الفلوس من النهارده و قول انا ناوى يكون معايا فلوس عشان اساعد ناس محتاجه اكتر و اني اكون سبب في فرحه ليهم و اني اسعد اللى حوليا و رغم كدا عمر الفلوس ما هتكون تعلق ليا او سبب فى جعلي فى دوامه لا تنتهي من السعي ورائها.
الرحلة اللى بتكلم عليها دي هيقابلك فيها اصحاب جمال زي القلق و الخوف و الصبر و الخسارة يعني لما تستثمر في حاجة و تحس انك بتخسر وانت كل اللى في دماغك انك تفضل تكسب و بس اكيد الكلام دا صح فى الواقع يعني زي لما بتكسب لازم تخسر .
الخوف من المستقبل امر كلنا بنعاني منه اننا نكون خيفيين ديماً من المستقبل لان المستقل دا مش معروف باى حال من الاحوال كتير مننا يكون اما عايش فى الماضى و القلق او المستقبل و الخوف اغلبنا محصور فى المناطق دي و يمكن اصعب حاجة انك تسكن فى اللحظة الحالية و قوة الشعور بالان يعني انك تكون فى اللحظة الحالية و الحالية بس بدون النظر الى المستقبل او الماضي .
ان الناس تبقي عايشة اللحظة الحالية فقط هو دا الجمال بعينه انها متكنش متعلقه باى حاجة سواء محجوزه فى سجون الماضي او اوهام المستقبل اللى كتير قال انها مش هتحصل اساساً هي مجرد اوهام عقلك بناها عشان يسجنك فيها و يسيطر عليك .
ان اللحظة الحالية اتكلم عليها ناس كتير كتاب قبل كدا زي ايكهارت تول مثلاً فى كتاب قوة الان بس اللحظة الحالية انا شايف انك متقدرش تحكي عنها فى اى كتاب لانها مش بتتوصف بالكلام للاسف و دا رايي الشخصي اللي ممكن يكون صح او غلط .
اللحظة الحالية هي اللى تخليك تتخلي عن مفهوم ان الفلوس حرام او شىء وحش او مش جميل و انها متبقاش مسيطره عليك و تتحكم فيك بس خليك فاكر ان زي ما بتكسب ممكن تخسر الحياة مش كلها وجه واحد مكسب بس لا ممكن تكون مكسب و خسارة او الاتنين مع بعض يعني ممكن تكسب حاجات و تخسر حاجات في نفس ذات الوقت هي دي الحياة قد تكون غير عادلة لو انت بصيت ليها بنظرة تشاؤمية لكن لو نظرتك اتغيرت اكيد هتشوف الحياة بصورة تانية .
نظرتك للحياة ممكن تخليها حلوة او وحشة على حسب رؤيتك ليها فان عينك بس هي اللى بتحدد قيمة الحياة ايه بالنسبة ليك و ان الصبر دي معادلة صعبة انك تصبر علي اي حال انت عليه امر مش سهل اكيد و محتاج تعود و الصبر محتاج صبر شفت بقي المعادلة الصعبة دي .
مش بقولك ان الحياة فيها كتير و ان خلينا متفقين ان عليك الايمان و الصبر معاً يعني عايز اقولك ان الدكتور ابراهيم الفقي رحمه الله عليه قال ان في كتير مننا اخد احلامه معاه فى القبور يعني معرفش يحققها تفتكر ليه ؟
ايوا صح عشان خاف يحاول و نتيجة انه خاف انه يحاول محاولش فعلاً فوداه للطريق دا بس كدا الخوف شعور يوقفك مكانك بدون تحرك بالتالي هيخليك تشوف حاجات كتير فى صور مش صورها الاصليه بس كدا .
من النهاردة اقبل خوفك و اقبل الجزي اللى جواك رافض ليها و الجزء المقاوم ليها و باذن الله واحده واحده هتحس بالتغيير افتكر الصبر و الايمان و الاستمرارية كلمات السر للطريق دا و ان الطريق ديماً هيختارك مش انت اللى بتختاره و ان لما يجهز التلميذ يظهر المعلم .
