بطل تدور علي استحسان الناس
في كثير مننا لما يجي يعمل حاجة حلوة يبقي من جواه عايز كل شوية الناس تقوله ياه لا شكراً بجد مش عارفين من غيرك كنا عملنا ايه و الله .
طبعاً الشعور دا حلو مفيش كلام لكن خلينا نكون متفقين كدا بصراحة مش بيحصل علي طول يعني مش كل لما تعمل لحد حاجه هتلاقيه يمجد فيك و يقولك يا سلام عليك ربنا يكرمك .
الحقيقة انه لا .
دا في اوقات كثير كأنك معملتش حاجه للشخص دا من الاساس .
النهاردة فى الحته دي بقولك اوعي يكون هدفك اليومي انك تفضل تلم في استحسان من الناس و كأنك مفتقر للحته دي جواك عشان ديماً هتعملك مشاكل بمعني انك كل لما هتعمل حاجه لو حد مشكرش هتقعد زعلان .
و تاخد و تدي مع نفسك هو ليه محدش قالي شكراً و شكرني و انا استحق دا بجد .
طبعاً انت تستحق تتشكر و دا اللي المفترض يحصل انا معاك بس مش معني انه محصلش ان في حاجه غلط و تزعل نفسك علي افعال ناس تانية انت ملكش سيطره عليها اللي بطلبه منك هنا انك تعتبر الامر دا عادي وممكن كتير يحصلك .
يعني تبطل تعلق نفسك بالحبال الدايبه زي ما بيقولوا كدا .
عملت حاجه حلوة حد شكرك خير و بركة محدش شكرك برضه خير و بركه و عادى .
طب خلينا نتكلم بقي عن سلوكك انت .
هنا بقي انت اتدرب من النهاردة لما اي حد يعملك حاجة تشكره لان فعلاً بتفرق معاه .
و لما تقولها قولها من قلبك مش باللسان و السلام .
لاني انا ديماً مؤمن ان اي حاجة بتطلع من القلب بتوصل بسرعه اسرع من اي حاجه متقاله باللسان فقط من غير مشاعر .
بالمناسبة اقبل كل مشاعرك و متحطش لمشاعرك عوائق و حدود يعني اقبل الحلو و الوحش منها بكل حب مش لما تحس بشوية اكئتاب او قلق او حزن تبقي عايز ترميه فى الزباله لا هما دول برضه مشاعرك .
اعتبرهم كدا زي اولادك حد يقدر يرمي اولاده فى الزبالة ؟
اكيد لا .
يبقى من دلوقتي غمض عينك و قول انا بقبل كل مشاعري و بقبل الشعور اللي جوايا رافض ليها و بقبل مقاومتي ليها و بدعها تمضي في سلام و امان و اطمئنان .
خليك من النهاردة صادق مع نفسك فى ما يتعلق بالرغبة في الحصول علي الاستحسان طول الوقت و زي ما بتقول الكاتبة الشهيرة لويز هاي متقعدش كل شوية تسحل نفسك في طلب المزيد و المزيد من الاستحسان .
خليك فاكر اننا مختلفين و عشان كدا عيش بالفكرة دي جواك و انت هترتاح .
اقبل كل حاجة واي حاجة و خلي اقل حاجة تسعدك لان عمرها ما كانت السعادة فلوس ففي ناس معاها كنوز الدنيا بس مش عارفه تستمتع بيها .
السعادة مش في كلمة شكراً السعادة في انك تساعد الناس و تكون نور ليهم و متنتظرش منهم الشكر و الاستحسان .
و بس كدا .
